VERWARD – EN NOG OP SOEK …
KAALVOET in ’n swart kortbroek en sonder ’n hemp het die bruingebrande, gespierde sitrusboer pas langs die mooi blondine op ’n rusbank kom inskuif.
Verlede Oktober was hulle nog twee liefdesduifies wat tussen pienk en wit lentebloeisels op Huisgenoot se voorblad vir mekaar gekoer het.
Nou is die atmosfeer tussen Rox-Zee Veldhuizen en JJ Stander gespanne hier in haar ouerhuis in Hillcrest, Durban. Die 25-jarige boer van Citrusdal in die Wes-Kaap het die drie weke van inperking saam met haar by haar ouers kom deurbring. Hy help fluks in die huis en het pas een van die vertrekke gestofsuig.
“Dit is jóú keuse of jy hier wil rondhang. As jy wil loop, kan jy loop. Maar jy hou duidelik van my geselskap; daarom is jy nog hier,” sê sy en kyk ’n oomblik stroef na die aantreklike donkerkopman langs haar.
“Jy is baie aan en af die laaste tyd. En dit verander deur die dag,” kap JJ terug.
“Een dag is jy só; die ander dag is jy só. En dit verander twee tot drie keer per dag! Vanoggend was als fine toe jy wakker word; nou sit ons hier en jy het klaar verander. En dit is nou eers elfuur,” voeg hy moedeloos by.
Dan, skielik, asof sy pas van die videoonderhoud met onthou het, draai Rox-Zee (29) haar blik terug na haar selfoonskerm. Met bloedrooi geverfde vingernaels vryf sy vinnig deur haar blonde hare en vee daarmee saam JJ se klagtes
