Luister hoe die bome fluister
As ’n mens eers jou staan, sit of lê gekry het onder die Fluisterboom by Georgestraat 4 op Albertinia, sukkel jy om te glo Marietjie Coetzee en haar eerste man, (wyle) Loekie, het glad nie eens dié kolossale wildevy (Ficus burkei) óf sy ewe formidabele kleinboet, die Luisterboom, weerskante van die huis raakgesien toe hulle meer as 15 jaar gelede die eerste keer na die eiendom kom kyk het nie.
Maar dié “bysiendheid” is plotseling vergewe en vergeet as jy die imposante sesslaapkamerhuis gadeslaan wat op ’n voëlvlug met Google Earth kompleet soos ’n vliegtuig of voël met uitgespreide vlerke lyk. Die woning is tussen 1965 en 1970 deur Koos Kemp, destydse burgemeester van die dorp, gebou, en vanweë die ondergrondse water wat al eeue lank hier uit die aarde opstoot, moes ’n vlotfondament gebruik word.
Marietjie-hulle het doerie jare nog net op Albertinia kom kuier by haar suster Leah en dié se man, wyle Sampie, wat in 1996 die bekende aalwynkosmetiekbesigheid Aloe Ferox op die dorp begin het en waar Marietjie se een dogter, Hanlie Hornsveld, ook vandag werk. Die lap fonteinland van 1,6 ha het toe nog Kannafontein geheet, en volgens die 1920-titelakte moes “Plot 64b van die plaas Grootfontein” die buurerwe van water, brandhout en waswater voorsien. Twee beeste kon ook
