Dis hemels op Haenertsburg
Wanneer ’n mens van Tzaneen af Haenertsburg toe ry, kan jy kies tussen twée pragtige kronkelpaaie: die een gaan oor George’s Valley en die ander oor Magoebaskloof. Met albei klim jy 620m die Wolkberg in en ry verby waterstrome, inheemse woude en manjifieke bome – groot ou reuse wat die hemele in strek. Die vogtige lug wat hier boontoe beur, skep ’n spesifieke mikroklimaat op “die berg”. En, sê die inwoners, hier in die land van die silwer mis kan ’n mens meestal grys dae en stuifreën verwag.
“As die son hier én op Tzaneen skyn, is daar gewoonlik ’n temperatuurverskil van 5 ºC,” sê Sandi Leigh Moore, ’n grafiese ontwerper. “Hier is net twee swembaddens op die dorp, maar almal het ’n kaggel.” Sandi is die eienaar van The Mountain Company, wat begeleide bergfietsritte, staptogte en toerismeinligting aanbied.
Baie van die inwoners – ook Sandi – hou van al die seisoene die minste van die somer, omdat die dae vir weke aaneen grys en nat kan wees. “As die weer aaklig is en jy wil gaan fietsry, kan jy verby die dorpie opry tot bo by die bergrug, van waar jy Moria, 20 km van Haenertsburg af, kan sien. Jy sak dan af in die bosveld vol turksvye,
