Hup Holland hup !
Dag 1
Ons arriveer in Nederland, en ná sowat ’n uur per motor kom ons aan op die mooiste klein vissersdorpie in die Friesland-streek, Hindeloopen. Jy kan jouself verbeel jy is in ’n fliek. Die span van die huisboot-verhuringsdiens Le Boat (sien bl. 26) verwelkom ons en ná ’n kort les is ons reg om die kanale van Nederland aan te pak op ons Horizon 4-huisboot (letterlik ’n huis op water – 4 slaapkamers, elkeen en suite, en ’n wonderlike kombuis met alles waaraan jy kan dink). Ons slaap die eerste aand in die hawe sodat ons Hindeloopen kan verken, per fiets. Nou straatjies en kliphuise. Die dorp grens aan die Ijsselmeer (wat eens deel van die see was).
In die hawe kry jy vars vis en lekker yskoue bier. Een van die vissers in die hawe, Swanhilde Kieft, fladder soos ’n vlinder tussen die houtbote deur terwyl sy vir ons fluweelkrappe wys en vis wat vroeg gevang is. “Die lewe hier is stadig, niks jaag niemand nie.” Die mense gee om vir die see en besef maar te goed die see se geskenke is hul grootste bate, en daarom pas hulle dit goed op. “Ons vang vis met houtbote en nette, soos in die 1900’s, sonder enige tegnologie of slim, moderne maniere.” Dis by die klein kroeg skuins langs die hawe waar ons vis gaan eet en hierdie anderste aartappels proe: Klein klontjiekapokaartappels wat in netjiese rosette gespuit en dan in warm vet goudbruin gebraai word. Met vars vis kies
