Hoekom Maleisië?
Toe ek in 2021 aftree, was daar die vooruitsig van sielsalige dae in die sprokiesagtige Simonstad. Min het ek geweet ’n heerlike avontuur wag op my wat stereotipiese aftrede sou fnuik.
My kinders verlaat die land een ná die ander en drie uit die vyf is reeds weg. Toe my dogter Liezel aankondig sy gaan in Maleisië skoolhou, het ons besluit Ouma gaan saam. Ek het al in agt lande gewoon en gewerk as onderwyseres en toe ek nog een kon ontdek, het ek die kans aangegryp. Die idee was om Liezel en my kosbare kleindogters Kaela en Olivia te help vestig, maar nou lyk dit of dit ’n meer permanente verblyf kan wees.
Die lande waar ek al gewerk het, buiten Suid-Afrika, is Soedan, die Verenigde Koninkryk, Kenia, China, Egipte, Namibië en Uganda. Maleisië is verreweg die sagste, mooiste en vriendelikste van almal! Die klimaat is goed, kos heerlik en die mense van soveel kulture