‘JY MOET NET JOUSELF WEES EN NIE TOELAAT DAT IEMAND DIT VIR JOU BEDERF NIE’
DIE tweeling se gunstelingtydverdrywe sluit in om die skop-skiet-en-mokerreeks S.W.A.T. op TV te kyk, hoender en pasta vir aandete te maak, en hul litte op die maat van Shawn Mendes en Camila Cabello se “Señorita” te swaai.
Met ander woorde: doodgewone tieners, vol lewenslus, en ’n ononderbroke geklets.
Hul ouers sal jou egter ’n ander verhaal vertel. Die feit dat hierdie twee meisies énigsins normaal kan lewe, wat nog te sê kan dans en kerjakker, is niks minder as ’n wonderwerk nie.
Die bewys daarvan is die effense kanteling in elke meisie se kop en chirurgiese letsels wat onder hul welige donker haredos verberg word.