CHANÉ kyk en kyk. Knipper haar oë en kyk weer, asof die vinnige beweging iets sal verander aan die beeld wat voor haar afspeel. Dit kan nie wees nie. Nie háár dr. Smith, lektor aan die Universiteit Stellenbosch, fakulteit lettere en wysbegeerte, nie.
Maar dit is tog sy kop met die wyerkringende oop kol, bril nou skeef gedruk op die neus en rooiring-ooglede. Besig om ’n voorgraadse student warm te vry. Geskok sien Chané hoe hy die giggelende meisie se wynglas weer opvul nadat hy eers moes asemskep.
Dit lyk asof hy sy kop gaan draai, en Chané vlug oor die sypaadjie, terug na haar kar wat aan die oorkant van die kroeg geparkeer staan. Die deur slaan toe en dryf die vrolike klanke van stemme en musiek net betyds uit, voor die walging daarvan haar oor die afgrond stoot. Haar hart klop hard in haar ore.
“Hoe de hel het dit gebeur?” Sy sê die woorde
