LIEWE LESER,
MY BREIN wil dit amper nie verwerk dat ons al weer aan die einde van nog ’n jaar staan nie.
In Januarie het ek op my rusbank gesit, hoogs tevrede dat my dekor en meubels uiteindelik lyk soos wat ek en my oorlede man dit beplan het. Die lêer wat ons destyds saamgestel het met idees en foto’s kan nou uiteindelik ná vyf jaar toegemaak word.
Ek vryf ingedagte oor my ringvinger. Die hitte laat die laaste diamantring wat Sampie vir my gekoop het effe styf sit.
Dit is ’n pragstuk. Hy het dit in 2016 vir my gegee om die première van Vir die voëls te vier.
