Rian van Heerden lyk nie juis vanoggend lus vir die wêreld nie. Verstaan goed: Hy is professioneel en beantwoord die vrae breedvoerig. Maar sy oë kyk oral behalwe op die rekenaarskerm. Dit lyk boonop of hy homself so klein moontlik wil maak. Dis ’n video-gesprek – hy sit in Pretoria en ek in die Kaap – en sy kop is doer onder op die skerm. Die res word gevul deur ’n Batman-plakkaat en . . . die plafon.
Sy grys hare is soos gewoonlik netjies agteroor gekam, maar ’n weerbarstige stringetjie hare het op sy voorkop uitgekruip.
Verbeel jy jou, of is dit ’n krulletjie, daai?
Dan verander die stemming, dalk te danke aan die sluk koffie wat hy so pas geneem het. Hy gee ’n kenmerkende Rian-laggie, dan nog een. Sy stem kry daai strelende kwaliteit wat jou soos ’n kat wil laat spin. Of jou van aandoening wil laat huil. My buurvrou het gereeld getjank as hy Good Morning Angels – wat mense op allerhande maniere help – Woensdae op Jacaranda FM se ontbytprogram aangebied het. “Die mense se stories – en sy mooi stem . . .” verduidelik sy. Asof dit heeltemal sin maak.
Nou kan mens boeke vol skryf oor Rian se dans met omstredenheid. Hyself het ’n outobiografie die lig laat sien op ’n rype 43: Dié getal dui beslis nie op op Suid-Afrikaanse radio: op Radio Tuks (nou Tuks FM), Punt Geselsradio, Jacaranda FM, OFM en kortstondig 702. En het daarop floreer om die grense – enige grens – plat te loop. “Ek en DJ’s soos Gareth Cliff, Jeremy Mansfield en Mark Gillman het meegeding wie die meeste in die koerant is . . . Ek het op een dag drie keer voor die Uitsaaiklagtekommissie verskyn.” Vir drie verskillende klagtes, ja.
