Boereplan
Byna 90 droë boorgate later kon Heinz en Almut Gruhn, die Namibiese egpaar wat pas as die Suider-Afrikaanse Stoetteler van die Jaar bekroon is, hul getal beeste met ’n verbysterende derde vermeerder.
Die gebruik van gatdamme en sonpompe speel ’n belangrike rol in die sukses wat hulle met hul Hereford-stoetery en kommersiële boerdery behaal.
Die Gruhns boer op die plaas Otongovi, 135 km noordoos van Windhoek, met hul Otongovi Hereford-stoetery, kommersiële beeste, osboerdery, kleinvee en vrylooplêhenne. Hulle is pas as die Lewendehawe-registrerende Federasie (LRF) en Molatek se Suider-Afrikaanse Stoetteler van die Jaar bekroon nadat die stoetery in 2014 en 2022 die naaswenner was, en in 2014 wenner van die Koeigroep van die Jaar-kompetisie. Die egpaar het ook al 4,5 sterre vir volledige prestasiemeting en-aanmelding van Breedplan ontvang. (Hou Landbouweekblad dop vir ’n artikel oor hul veebenadering.)
Op Otongovi word hul stoet- en kommersiële koeie eenders bestuur. Die stoetkoeie word gebruik om teeldiere te teel
