DIT was liefde met die eerste oogopslag.
Toe Bennie en Mila Fourie die eerste keer hier instap, was dit soos om af te kom op ’n oase. En toe hulle ’n uur of wat later weer by die huis met sy “Te koop”-bordjie uitstap, het hulle geweet: Dís die een.
“Ja, maar hulle was ook slim,” sê Bennie oor die verkopers. “Hulle het die regte musiek gespeel, die kaggeltjie was aan. Ons het so lank hier rondgehang, ons het later besef ons moet seker gaan. Ons het hier uitgestap en niks gesê nie.”
“Toe ons in die kar klim, was dit net stilte,” las Mila by.
Dít, het hulle sommer weer besef, is hoe dit voel as jy die regte een vind.
Jy wéét net.
Dit was Maart toe hulle die aanbod op hul eerste huis gemaak het. In April is hulle getroud. En nou, hier vroeg in September, kon hulle eindelik intrek in hul eerste, eie huis hier in die skadu van Tafelberg.
“Daar het baie dinge baie vinnig gebeur,” sê Bennie (35). “Ons het verloof geraak, toe getrou en