“Ek hou niks van dié somber weer nie.” Nila kyk hoe haar ma in die tuin rondkrap. “Dit voel soos begrafnisweer.”
“Wat is begrafnisweer?” wil Sheila weet.
“Wanneer daar so ’n donker wolk van hartseer rondhang oor begrafnisgangers,” antwoord Nila haar ma. “Die afgelope paar naweke is die weer donker met die son wat net nou en dan deur die wolke loer.”
“Bring liewer vir my ’n glas yskoue Oros, asseblief. Ek is amper klaar”, sê Sheila.
Nila verkyk haar aan die kleurvolle plantjies wat haar ma geplant het. Haar ma het nou eenmaal groen vingers. Alles wat sy plant, groei en blom so mooi. Die vetplante in ongewone houers van ketels tot skoene en blikemmers - getuig daarvan. Net jammer dat haar ma en pa se huwelik nie ook só kon blom nie.