DIE man voor die stoof sit die eierspaan neer en maak sy voorskoot stywer vas. Hy tel weer die spaan op en draai behendig die plaatkoekies in die pan om. Tussendeur maak hy grappies met sy sewejarige dogter by die kombuistafel. Sy het nog haar pajamas aan en lag terwyl sy stroop oor haar plaatkoekies drup.
So lyk ’n tipiese Saterdagoggend in Kaapstad in die huis van Geordin Hill-Lewis, “GHL” vir sy ou skoolvriende en net “Geordie” vir sy ma, maar Meneer die Burgemeester vir inwoners van die Moederstad.
Al laat sy werk hom bontstaan, bly plaatkoekies op Saterdae een van die gesinstradisies wat ononderhandelbaar is.
“Soos sy vergaderings ál meer geraak het, moes ons doelbewus begin tyd maak om saam te wees,” vertel sy
