Mense wat al in die Oorlogskloof was, sal jou altyd dieselfde twee goed vertel: Dis ongelooflik mooi, en ongelooflik rof. Van die eerste opmerking wil ek niks misloop nie; van die tweede wil ek niks weet nie. Gelukkig is dit ’n klomp gesoute stappers én veldkenners agter wie ek deur die Saaikloof aantou. Ek dink ons gaan die volgende paar dae in verwondering én orraait wees – hier waar dit lyk soos die eerste, oudste landskap.
DAG 1 4KM Groot Tuin na Brakwater
Vandag se skof is ’n kortetjie, party mense hou reguit by Brakwater verby na die volgende hut toe. Iets anders wat ons egter óók vooraf gehoor het, is dat die tweede dag glo jou sake werk, daarom het ons wyslik besluit om nou net eers rustig in die ding in te kom – dan sal môre ook hopelik gladder verloop.
Ons het seker al sowat 2km gestap, en klim nou teen die suidelike rantjie van Saaikloof uit. Omheen begin die Oorlogsklooflandskap wat ’n mens op die internet sien, kop uitsteek: klowe kry klofies, rante riffies en koppies hoedjies. Mensig, maar hier’s vir jou klíp! Nes ons touleier ’n lekker tempo in die sandpaadjie handhaaf, pootjie ’n rots my amper. Dis op en af en rondom. Dit voel ook asof daar ’n rots bínne-in my rugsak beland het. Die laaste 500m is ’n goeie voorsmakie van wat die volgende paar dae voorlê: ’n Geklou aan houtlere en kettings om oor en