Ons lééf nie meer nie, ons bestaan net.
Sowat 95% van deelnemers aan die Britse studie Autopilot Britain erken dat hulle op stuuroutomaat leef. Dit beteken dat hulle nie betrokke is by die wêreld om hulle nie en onbewustelik besluite neem.
Dit geld wêreldwyd, sê kenners.
Ons neem trouens daagliks tot 15 besluite sonder om daaroor te dink. Dis nagenoeg 250 000 in ’n leeftyd! Volgens die Britse studie is ons “te besig” om te dink wat ons doen. Ons is ’n aandagafleibare geslag.
Wanneer jy outomaties leef, leef jy in die verlede of in die toekoms, nie in die oomblik nie. Volgens navorsing aan die Harvard-universiteit in Massachusetts dwaal ons aandag gemiddeld 47% van die tyd dat ons wakker is.
Terwyl jy so ingedagte is, probeer jy waarskynlik ’n probleem oplos of jy is verveeld of bekommerd. Soos Johannes de Villiers, blydskapnavorser en skrywer van onder meer Kalmte in die malle gejaag, sê: “Jy verdwaal in jou kop se storie.”
Dis dan dat jy werk toe ry, maar niks langs die pad oplet