Die Duiwelskloofroete in die Banhoekbewarea is deksels taai. Dis vir mense wat dink aanwysingsborde is net vir lughawens. Goed, ek oordryf ietwat, die eerste vyf kilometer is heeltemal skaflik vir die meeste stappers. Trouens, dis ’n gawe avontuur.
Die Banhoek-bewarea beslaan ongeveer 54 km²-privaatgrond rofweg tussen Jonkershoekberg en die Plaisir de Merle-wynlandgoed, noordoos van Stellenbosch.
As jy vroegoggend by die ingangshek op die Ou Bethlehem-plaas instap, troon die Groot-Drakensteinberg donker en dreigend oor jou uit.
Jy sien die kloof net voor jou. Aikôna, dis nie Duiwelskloof nie. Duiwelskloof is daardie donker skeur doer links. Hoewel stappers welkom is, is die paadjies eintlik meer bedoel vir fietsryers. Jy