Babas en peuters se dagslapies behels baie meer as ’n vinnige ruskansie vir jou ook. Dit is ’n belangrike deel van jou baba se roetine en het ’n regstreekse invloed op sy ontwikkeling en gemoedstoestand. ’n Oormoeë baba is immers ’n moeilike baba en dit wil jy tot elke prys vermy.
Tog is dit dikwels ’n groter uitdaging om babas bedags ’n uiltjie te laat knip as om hulle snags aan die slaap te kry en te hou.
Ons het by kenners gaan kers opsteek.
’N RUSKANS VIR BABA
Hoe lank jou baba bedags slaap, hang in ’n groot mate van sy ouderdom en persoonlikheid af, sê Lee-Ann Stretch van Sleep Matters in Johannesburg (sleepmatters.co.za). ”Elke baba verskil, maar daar is basiese riglyne.”
’n Baba onder drie maande slaap vier tot vyf keer per dag, sê Megan Heuer, ’n spelterapeut, berader en slaapafrigter van Pretoria (goodnightbaby.co.za).
’n Baba van drie tot ses maande sal waarskynlik drie dagslapies geniet, ’n baba van ses tot 12 maande sal twee keer in die dag slaap en een van 12 tot 18 maande het een of twee dagslapies