Om ’n topvleisbeesteler te wees, moet ’n mens weet watter tipe dier jy wil teel en wat jou doelwitte is, en daarvolgens jou bloedlyne kies. In ’n suksesvolle stoetery moet daar ’n gesonde balans wees tussen teelwaardes, fenotipes en bloedlyne. “Dit is waarna ons streef en waarom die DNS van alle geregistreerde diere wat gebore word, volledig ontleed en hul ouerskap getoets word.”
Só sê mnr. Seymour Currie, eienaar van Joyce’s Angus, wat op Wolwedans, een van sy plase by Klipheuwel, bedryf word. Hy en sy kuddebestuurder, mnr. Willem (Worsie) Swart, hou die leisels van een van die Wes-Kaap en waarskynlik Suid-Afrika se toonaangewendste Angus-stoeterye – ’n ware teler van kampioene.
Op Wolwedans is dit uit die staanspoor duidelik dat Currie volgens vaste riglyne teel en niks aan die toeval oorlaat nie. Hy teel ook nét Angusse – aanvanklik net swart en later ook rooi Angusse. Hy het in 1991 kommersieel met Angusse begin boer en die stoetery Joyce’s Angus is in 2010 by SA Stamboek geregistreer. Tans bestaan die totale kudde uit meer as 1 000 swart en rooi Angusse.
Twee vaste riglyne word nougeset in die boerdery gevolg, naamlik om die ideale geboortegewig en ’n puik speengewig te handhaaf. Dit is ook riglyne wat belangrik is vir die SA Angus-beestelersgenootskap.
“Ons probeer deurgaans