WAT koop jy vir jouself as jy reeds elke moderne gerief en luuksheid onder die son besit?
Vergeet tog van peperduur motors en seiljagte – iets wat werklik bewys jy is skatryk eerder as net gewoonweg ryk, is ’n privaat eiland net vir jou kunsversameling.
Fliekgangers wat die Netflix-rolprent Glass Onion met Daniel Craig gekyk het, het hulle verkyk aan die verruklike eilandbestemming waar die tegnomagnaat Miles Bron sy meesterstukke van miljoene bêre – maar “kunseilande” is al lank ’n werklikheid onder dié wat dit kan bekostig.
Die Russiese kunsmismiljardêr Dmitri Ribolowlef is glo onder dié wat hul versameling iewers op ’n eiland afgesonder wil hou. Die oliegarg en meerderheidseienaar van AS Monaco-sokkerklub bou glo ’n oord op Skorpios, ’n Griekse eiland wat hy sedert 2013 besit deels om sy talle kunsskatte te huisves, teen $200 miljoen (R3,6 miljard).
Die plesiere van ’n eilandgalery – hetsy afgeslote of oop vir die publiek – is al goed gevestig in internasionale kunskringe.
“Wanneer jy per boot na die eiland reis, is daar iets wat in jou kop gebeur: Jy is oop vir nuwe idees, nuwe gedagtes,” sê Charles Carmignac, wie se familieversameling in ’n villa aan die Mediterreense eiland Porquerolles gehuisves word.
“Jy is nie in ’n onrustige bui soos wat jy dalk sou wees as jy jou in die middel van ’n stad sou bevind nie.”
Charles is die seun van die 75-jarige Edouard Carmignac, een van Frankryk se suksesvolste – en glansrykste – batebestuurders. Edouard die “rockfinansier” genoem nadat hy die Rolling Stones vir ’n optrede op ’n privaat partytjie in 2012 bespreek het.
