‘BIP-GIK-DIT. Ree ra, roo, ry, ro, ru, roe,” sê Palawa die kameelperd.
Sy trek haar rooi lippe op verskillende snaakse maniere.
“Wat op aarde maak jy, Palawa?” vra Paloeka die leeu.
“Ek is met stemoefeninge besig sodat ek beter kan artikuleer wanneer ek praat,” antwoord Palawa.
“Wat beteken artiekiebreer?
Al-liedjie-leer?” vra Paloeka.
“Artikuleer, Paloeks. Dit beteken hoe duidelik ons iets uitspreek. As jy wil hê mense moet kan hoor wat jy sê, moet jy jou tong en lippe lekker laat saampraat. Jy moenie die geluide wat jy maak, insluk nie. Jy moet praat as jy wil hê mense moet luister,” sê Palawa.