VANJAAR mág hulle maar vier. En sommer behoorlik uithang. Dit was immers húl jaar, en daar is baie om hier in die feestyd te koester.
Die afgelope sewe jaar sit kykers weeksaande vasgenael voor die kassie en deel in die lief en leed van die inwoners van die dorpie Ruiterbosch in Suidooster.
Daarom het aanhangers saam feesgevier toe die geliefde Kaapse sepie op die 16de Saftas, die land se grootste televisie-en fliekprysaand, in September aangewys is as die beste Suid-Afrikaanse sepie.
Suidooster is nie net ’n sepie wat kykers vermaak nie; dis ook een wat diversiteit en inklusiwiteit vier. Die karakters het uiteenlopende geloofsoortuigings, sowel Christelik as Moslem, en die vervaardigers probeer dié tradisies so geloofwaardig en getrou moontlik uitbeeld.
Die akteurs loop elkeen hul eie lewenspad en vier tradisies op hul eie maniere, maar die feestyd is vir almal spesiaal – ’n tyd van samesyn, familie en besinning oor die dinge wat kosbaar is.
Dit is ’n Saterdagoggend toe Huisgenoot ’n spesiale fotosessie hou om vanjaar se groot sepiewenners hier in die feestyd te vier, en hoewel die akteurs vandag geen tonele skiet nie, kom meld hulle geesdriftig aan by die Atlantic Film Studios in Montague Gardens in Kaapstad, waar die reeks verfilm word.
Eers gaan sit hulle in die susters Islyn Salie en Charlene Goliath-Green se grimeerstoele vir hare en grimering. Maar dié slag is dit nie om in karakter te
