SPESERY- MENGSELS &GEURSOUT
Koffie-en-paprikavryfmengsel
Om koffie by ’n geurmengsel vir vleis te voeg, klink dalk vir jou vreemd, maar probeer dit gerus. Die diep, donker smaak van koffie werk wonderlik saam met speserye. Die span in die ateljee het gesmul aan hierdie varktjops. Jy kan die vryfmengsel ook vir hoender-, lams-, bees-of wildsvleis gebruik.
VRYFMENGSEL
• 30 ml sagte bruinsuiker
• 10 ml fyngemaalde koffiebone
• 15 ml gerookte paprika
• 5 ml knoffelsout
• 3 ml varsgemaalde swartpeper
• 5 ml gemaalde komyn
• 3 ml cayennepeper
• 5 ml droë Italiaanse kruie
• 3 ml droë rissievlokkies
• 6 varkneksteaks of -lendetjops, teen kamertemperatuur
• Olyfolie
Meng die suiker, koffie, paprika, knoffelsout en peper saam. Braai die komyn in ’n droë pan tot geurig en roer die cayennepeper, droë kruie en rissievlokkies by. Braai tot geurig en laat afkoel. Voeg die gebraaide speserye by die koffiemengsel. Bedruip die vleis met ’n bietjie olyfolie en sprinkel die vryfmengsel oor elke tjop. Vryf dit lekker aan albei kante van die tjops in. Laat staan vir 30 minute voor die vleis oor die kole of in ’n pan gebraai word. Sit voor met brosgebakte aartappeltjies en koolslaai. Lewer 4-6 porsies.
Maak ’n marinade hiervan en voeg 100 ml olyfolie en 60 ml balsamiese asyn by.
