Toe ek verlede jaar as joernalis begin werk het, was ek bevoorreg om deel te wees van ‘n toer deur Suid-Afrika saam met Kia Suid-Afrika – voorwaar ‘n wonderlike geleentheid waarvan menige aspirantreisjoernalis bloot kan droom. Ons sou ‘n massiewe reis deur die land onderneem om sewe stede in sewe dae te besoek. Die doel van die Kia Seven7 Drive – soos hierdie inisiatief genoem word – is om pediatriese onkologie sale te besoek en geskenke vir die pasiënte af te lewer. Die 2021-reis was ‘n mylpaal-oomblik in my lewe en dit het my van die stryd wat hierdie pasiënte, hul families en die gesondheidswerkers wat sy-aan-sy saam met hulle veg bewus gemaak. Ek het my hart op die Seven7 Drive verloor en het myself belowe om die res van my lewe, op een of ander manier, deel te wees daarvan.
Die beginpunt
Op 20 September vanjaar het ek en ons toerleier, Danie Botha, mekaar by Kia se hoofkantoor in Edenvale ontmoet, vanwaar ons die 2022-reis begin het. Die eerste been was ‘n relatief maklike rit na Suid-Afrika se derde mees bevolkte stad, Durban. Dit het katte en honde gereën toe ons die stad via die N3 binnegery het. Ons het nietemin na die Parklands Hospitaal gery om die eerste geskenke af te laai. By die pediatriese onkologiesentrum is ons deur ‘n klein seuntjie wat van die pyn gehuil het, terwyl ‘n verpleegster probeer het om bloed te trek, begroet. Hy was nie veel ouer as agt of nege
