MAPSTIEKS, SKRYF SY!
HOOR ’n mens haar naam, klink die bekende kenwysie van Murder, She Wrote in jou gedagtes op. En saam met daardie wysie kan jy haar sommer voor haar tikmasjien sien sit.
Vir kykers wat die reeks in die 1980’s-’90’s gevolg het, sal Angela Lansbury áltyd die karakter Jessica Fletcher bly – die raaiselskrywer en amateurspeurder wat enige misdaad met sjarme en deursettingsvermoë kon oplos.
Maar haar hoofrol in Murder, She was net een deel van ’n wonderlike loopbaan wat oor meer as sewe dekades strek. Sy het ook in flieks en op die planke naam gemaak; nie net op TV as Jessica nie. En al onthou ons haar steeds as die middeljarige televisiespeurder, is Angela vandag 96 – en steeds aan die gang.
