OM MENSE WEER HEEL TE MAAK
MET die eerste oogopslag lyk Allison Vest se kantoor soos ’n makabere gruwelwinkel. ’n Verskeidenheid los vingers en ’n stel voorarms rus op een toonbank. Jy sien ook ’n verskeidenheid neuse, oë en ore, versprei tussen verskeie gereedskap, verfkwaste, gipsvorms en anatomiese tekeninge. En ’n verskeidenheid tepels lê op ’n chirurgiese skinkbord.
“Wanneer jy by my kantoor instap, gaan jy waarskynlik voel asof jy in ’n mal wetenskaplike se laboratorium is,” sê Allison. Maar vir die 60 tot 80 pasiënte wat jaarliks by Mosaic Prosthetics, haar kliniek in McKinney, Texas, aanklop, is dit wat sy bied niks minder as wonderbaarlik nie.
Allison is een van net 44 mense ter wêreld wat anaplastologie haar loopbaan kan noem. Oor die afgelope 17 jaar het sy hiperrealistiese silikoonprosteses vir mense met ontbrekende liggaamsdele geskep. Sy gebruik haar talente as skilder en beeldhouer tesame met opleiding in anatomie en ander wetenskappe.
Geen taak is te groot of klein nie – van ingewikkelde ledemate tot ’n eenvoudige wenkbrou – Allison (42) het deur die jare honderde mense gehelp by wie liggaamsdele ontbreek as gevolg van aangebore toestande, kanker, trauma of infeksie.
En nou is sy die onderwerp, op die kanaal TLC (DStv-kanaal 135).
