LESER SE GUNSTELING
BELINDA JOUBERT, Hartbeespoort
“Die Pilanesberg maak my gelukkig. Die stilte in die reservaat is intens, maar net totdat die veld saans begin kwaak en tjirp en fluit. Die naglug is gitswart en die sterre blink helder en soms hoor jy ’n leeumannetjie in die donker brul!
“Ons besoek Pilanesberg heeljaar en elke seisoen het sy eie sjarme. Die winter het goue grasvelde en dramatiese wolke. In die herfs verander die bome van kleur en dis dan wanneer jy al die insekte sien kos versamel – miskruiers, renosterkewers, langhoringkewers, vlinders en naaldekokers is oral.
“Ek het nou al byna alles in die reservaat gesien, selfs ’n sekretarisvoël. Jy leer gou dat die parmantige bloukopkoggelmander net so spesiaal is soos ’n leeu wat aan ’n karkas vreet.”
Volg Belinda op Instagram by @bj.inspire.
PILANESBERG-WILDRESERVAAT
As jy genoeg olifantbeelde by Sun City gesien het, gaan soek een in lewende lywe in hierdie Groot Vyf-reservaat. Pilanesberg is in die krater van’nuit gestorwe vulkaan en word deur heuwels omring. Meer as 7000 wilde diere en 300 voëlspesies kom hier voor en jy kan die reservaat op wildritte (selfry en begelei), stapsafari’s en selfs in ’n warmlugballon (gaan) verken.