TOUWS-, DUIWE- EN HOMTINIRIVIER
STAP EN SWEM
Die Tuinroete het báie dagstaproetes, maar nie almal bied ’n klankbaan van bruisende water en paddatjies nie. Hierdie drie by Wildernis is tops en loop stroomlangs.
Blouvisvanger
Dié bekende wandelpad volg die Touwsrivier, is ongeveer 7 km lank (heen en terug) en sien – veral oor naweke – baie voetverkeer. Dis een van Sanparke se skouponies, met plankiespaaie en netjiese houttrappies, heelpad koelte en twee watervalle met gróót swemgate aan die eindpunt.
Vroegoggend styg ’n mistigheid uit die rivier op wat die bos geheimsinnig stem. Die groene lyk groener, die skaduwees dieper en die bosbokkies asof hulle per radio ontbied is om presies wanneer jy by hulle verbykom, skielik uit die ruigtes te tree en jou met groot, vriendelike oë te verwelkom.
Inligtingsbordjies aan die westekant van die Touwsrivier vertel jou van die omgewing se boomspesies. Byvoorbeeld: Die outeniquageelhout (ook bekend as ’n kalander) is die hoogste boomsoort in die kontrei, en jy kan hom uitken aan sy sekelvormige blaartjies en donkergrys bas wat by ouer bome in lang krulle afskil.
Oorkant die water tref ’n mens weer ’n paar met foto’s en feite van voëlsoorte aan. Ooo, ja! Daardie swerm groengeel voëltjies wat ons vroeër gesien het, is Kaapse glasogies! Maar voor jy hierby uitkom, moet jy eers die Touws met ’n klein pont oorsteek. Dis groot sports! Sowat vier stappers kan op ’n slag op die platform pas, en jy trek jouself aan toue oor die stroom.
Wanneer ’n mens die watervalle bereik, is jy bly dat jy jou swemgoed en padkos saamgebring het, want hier wil jy lánk vertoef. Die boonste waterval se swempoel is mak maar