Die pad tot by Massingir Dam, die eerste bestemming op ons bos-tot-strand Desember-wegbreek, was propvol avontuur! Heel toevallig het ons lang dele van die roete soos op The Grand Tour bestuur deur die Top Gear trio Jeremy Clarkson, James May en Richard Hammond, raak gery. Sal ons hierdie keer op spoor bly of onsself weer (heel toevallig natuurlik!) op interessante en haas onbegaanbare agterpaadjies bevind?
Tot dusver het dit geblyk dat ons iets gedoen het om die visvang gode om te krap, want ons pogings op die skouspelagtige Massingir-dam was, om dit lig te stel, pateties! Dit ten spyte van uitstekende raad van die mense by Covane Community Lodge en top-klas hengeltoerusting danksy Iron River. Tog was daardie eerste paar dae hemels, danksy die spesiale herinneringe wat gedurende baie ure op die vissersboot gemaak is en laataand-geselsies rondom ‘n gesellige kampvuur. Dís mos Afrika op sy beste! Ons was egter steeds opgewonde om die lang ooswaartse tog na Mosambiek se welige subtropiese kuslyn aan te pak, in die hoop dat die tweede been se beplande diepseeen kushengelsessies in Xai-Xai beter resultate sou oplewer.
Hierdie been van die reis het dan ook met ‘n klein avontuurtjie van sy eie begin. Ons drie-motor “Grand Tour”-konvooi het skaars die veilige hawe van Covane verlaat, toe ons nuus kry dat swaar reën die grondpad in ‘n modderige gemors omskep het. Wat vir baie ander ‘n uitdaging sou wees, was vir ons ‘n uitnodiging om ons trio bekwame Toyotas behoorlik te toets! Dís mos waarvoor hulle gebou is!