Herinnerings-vlug die toekoms in
ANIKA staar strak voor haar uit voor sy die dubbelwhisky met twee slukke wegslaan. Sy probeer haar pose hou, maar die alkohol slaan haar asem weg. Sy kyk na die kelner en wys vir hom dat sy nog ’n drankie soek.
Haar oog vang ’n statige gryskopvrou wat haar neus omhoog en kopskuddend aanstaar, voor sy weer haar aandag tot haar koppie tee rig. “Hier is al ses vliegtuie oor,” kap Anika sarkasties terug, maar voel dadelik verleë oor haar aanmerking. Sy is nie ’n fyngevoelige mens nie, maar die pou oordeel haar heel waarskynlik net omdat dit tienuur in die oggend is en sy sopas ’n dubbelwhisky agter die blad het.
Sy krap koponderstebo in haar handsak rond, maar vind nie waarna sy soek nie. Die kelner sit nog ’n dubbelwhisky voor haar neer net toe sy ’n houertjie uit haar sak pluk. “Eureka!” roep sy uit.
