Oorlogverf
DIE geskuif van rubberskoensole op die novilonvloer breek die stilte in die lang gang soos Adam se haastige, lang treë tot stilstand kom. In sy een hand’nbos barbertondaisies en in die ander ’n klein silwer lapsakkie. Dis sy vrou, Marlene, se grimeersakkie wat sy altyd in haar handsak dra. Haar repair kit, soos sy dit noem.
Hy het haar soms dopgehou terwyl sy haar grimering sorgvuldig aanwend. Hy kon hom verkyk hoe sy reeds mooi vrou net genoeg grimering aansit om die prentjie af te rond, nes ’n skilder wat met die laaste fyn bewegings van sy verfkwas ’n beeldskone portret in ’n meesterstuk omtower.
Die belangrikste item in die sakkie is haar geliefkoosde rooi lipstiffie. Dis daai einste rooi lipstiffie wat sy sal aanwend voor sy die dag aanpak. “Rooi maak ’n stelling. Dit spreek van moed, passie, dapperheid en selfversekering, al voel ek nie diep binne in
