SOOS BLOED
‘HY HET IN STILTE GEVEG, ’N GROOT GEVEG, MAAR HY HET NIE VERLOOR NIE’
SOOS tyd, so vlieg als verby, het Theuns Jordaan in sy treffer “Soos bloed” gesing.
Maar nou het die lewe self vir die sanger met die borselkop, helderblou oë en fier postuur verbygevlieg. Op Woensdagoggend 17 November het sy rasperstem stil geword toe hy sy stryd teen leukemie verloor het. Hy is in sy slaap in sy huis in Pretoria oorlede.
Sy dood op 50-jarige ouderdom het as ’n groot skok gekom, want baie Suid-Afrikaners was onder die indruk dat hy op die herstelpad was sedert ’n suksesvolle beenmurgoorplanting in Maart vanjaar. Tipies Theuns het hy sy kankerstryd in privaatheid gestry.
In die dae voor sy dood het hy wel aan ’n hegte vriendin, Jacomien de Villiers, van die platemaatskappy Inhoud Huis, gesê dit gaan moeilik en dat hy swak is en sukkel om te eet. Maar hy het bygevoeg hy “byt vas en glo dinge sal beter raak”, vertel sy oor sy heel laaste boodskap aan haar.
Noudat sy lewenspad tot ’n einde gekom het, laat dit ’n lewensgroot leemte in die Afrikaanse musiekbedryf. Vir sy derduisende aanhangers was hy ’n superster wat met die sielvolle treffers “Beautiful in Beaufort-Wes” en “Sonvanger” hulle begeester en
