Op vrye voet
IS JY mal?”
“Ek kan nie leef sonder hom nie, Erich.”
“Die vertoning moet aangaan.”
Refreine in haar kop. Bloed wat agter haar oë klop. Vader, laat dit ’n beroerte wees.
Dood is al uitsondering. Die dood van die akteur.
Daarom moet Poppehuis aangaan, want sy is nie dood nie. Sy voel dood, maar dis nie ter sake nie. Nora kry lewe op die verhoog deur haar, Elisabeth.
“Die vertoning moet aangaan.”
Die ongeskrewe kontrak met ’n anonieme gehoor. Hulle betaal om die vertoning te sien. “Ons soek agterente op sitplekke. Vol sitplekke is julle versekering van botter op brood vir die volgende maand of twee.”
Wat het Erich nog gesê? O ja, hul geselskap gaan Nederland toe met Ibsen se Poppehuis. En sy speel Nora, die hoofrol.
Tot netnou was dit ’n voorreg, ’n hartsbegeerte – om Nora vir David te speel. Die beroemde Nora wat meeste
