BOEKEEN MUSIEK
Going to Ground – A geologist’s adventures in Africa and South America
Deur Nick Norman, The Franschhoek Press R320 in boekwinkels
Nick Norman het ’n suksesvolle loopbaan as ’n eksplorasiegeoloog agter die rug en sy werk – om grondmonsters te neem en te bepaal of ’n gebied ryk aan minerale is – het hom wêreldwyd laat reis.
Hy is nou 75 en hierdie memoir bekyk baie van die hoogtepunte van sy loopbaan in Suid-Amerika, van sy prospekteerwerk in die reënwoude van Guyana tot sy soeke na koper in die voetheuwels van die Andesgebergte.
Maar sy hunkering na Afrika het hom ook telkens na eie bodem gebring. Norman vertel van sy avonture in ’n lang lys lande, insluitend Botswana, die Demokratiese Republiek van die Kongo, Mauritanië en Tanzanië.
As jy hou van minerale en gesteentes, het jy moontlik reeds een van Norman se geologiegidse op jou rak. Sy vier boeke – Geological Journeys, Geology Off the Beaten Track, Box of Rocks en The Extraordinary World of Diamonds – het goed verkoop en in dié memoir vertel hy kortliks meer oor die veldwerk en skryfproses van elkeen.
