EK IS OOR NIKS SPYT
SY KORT hare is sout-enpeper en ’n diep frons keep tussen sy oë. Maar sy helderblou kykers blink met vasberade geesdrif.
“Ek het al oor en oor vir jou gesê, ek sou níks anders gedoen het nie,” antwoord Lance Armstrong effens geïrriteerd op vrae in ’n nuwe dokumentêr oor hom. Daarin praat hy sonder ’n sweempie berou oor die opkikkerskandaal wat van hom fietsry se gevalle held gemaak het.
Eens het die 48-jarige Amerikaner die wêreld aan sy voete gehad toe hy sewe jaar opeenvolgend die uitmergelende Tour de France-fietswedren gewen het – en dit ná ’n stryd teen testikulêre kanker. Maar die moedige fietsryer wat ’n inspirasie vir kankerlyers wêreldwyd geword het, het sy miljoene aanhangers se harte gebreek toe dit in 2012 bekend
