AANRAKING, JOU ÉÉRSTE TAAL…
’N Facebook-plasing tydens die nasionale inperking trek my aandag.
Pray for the huggers… we are not okay.
Do you know how hard it is not to hug
when you’re a hugger at heart?
The struggle is real.
Ek is ’n hugger.
Jy is dalk nie een vir drukkies en soentjies nie, maar die meeste van ons het aanraking nodig.
Die Kanadese Bookerpryswenner Margaret Atwood sê dit so mooi: Aanraking kom voor jy kan sien en voor jy kan praat. Dis die eerste en die laaste taal en dit jok nooit.
Die beroemde doofblinde skrywer Helen Keller het weer gesê jy kan die Paradys bereik deur aanraking. Hoe mooi, jy kan dáár uitkom waartoe woorde nie eens kan deurdring nie.
Die Covid-19-pandemie het ons ingelei in ’n distopiese era, een waar ons byna soos ruimtewesens tas in ’n wêreld waar mense deur middel van tegnologie kontak maak.
