GERED DEUR GENADE
Mammie, jy het aan die ander kant van die heining geland. Jy het histeries geskree, gehuil en’n geraas gemaak.
SHAUNTAY FORBES
‘n Mens se lewe kan sonder waarskuwing, in ’n oogwink onherroeplik verander. Só het ’n enkelma van Uitenhage in die Oos-Kaap amper te laat besef ná ’n grusame ongeluk byna die lewe van haar seun geëis het.
Net ’n maand voor die ongeluk in September verlede jaar sou haar seun, Riley (toe 5), nog elke keer as hy stout was en raas gekry het, vir ma Tarryn Forbes (26), ’n administratiewe assistent, vra:“Mammie, wat sal jy doen as ek doodgaan?”
“Ek sal jou net begrawe, ek sal nie eens huil nie,”sou sy dan grappenderwys antwoord. Tog het nagmerries oor dié gedagte haar begin teister, maar ook nie werklik voorberei op wat op haar gewag het nie. Albei Tarryn se jong kinders is ernstig in die skrikwekkende ongeluk beseer, maar Riley het die slegste daarvan afgekom.
Tarryn is self ernstig beseer en in ’n stadium het dit gelyk asof sy dalk nooit weer sou kon loop nie, maar dit was die minste van haar kommer. Wat vir haar die ergste was, was dat sy nie haar seuntjie kon bystaan in sy uur van nood in sy verbete geveg teen die dood nie, want sy was self aan ’n hospitaalbed vasgekluister.
Dinge was in ’n stadium so beroerd dat dokters reg was om die masjiene af te skakel wat klein Riley aan die lewe gehou het, maar hy was nog nie
