Rare mens, grote gees
Sedick Moegamat Tassiem sit oorkant my in die Hussar Grill in Mouillepunt. Vandag eet ons steak terwyl seiljagte op die blou see buite verbyvaar. Die dag ruik na bamboes en die klankbaan is meeue wat roep.
Sedick is een van die Kaap se rare voëltjies, hy sing soos hy gebek is. Daar is geen mens wat soos hy aantrek of lyk nie.
Hy is soos ’n karakter in een van die vele rolprente wat by die Labia-teater vertoon word, waar hy al oor ’n dekade as plekaanwyser werk. Besoekers van oor die wêreld heen het al vir foto’s met hom poseer.
Op sy naamplaatjie staan daar nou ook All Rounder.
