POSBUS
Kamp is die beste!
Ons het drie jaar gelede besluit om ons vakansies in chalets vaarwel te roep en met tente te begin kamp. Vandag kan ek met ’n groot gerustheid in my hart sê dit was ’n goeie besluit.
Elke mens put iets anders uit kampering, en só geld dieselfde vir my, my vrou, Wilna, en ons kinders, Teagan en Aiden.
Kommunikasie is mos een van die groot struikelblokke in die huwelik. Ek en Wilna het ’n alewige meningsverskil oor hoe en waar die tent moet staan. Een jaar terwyl ons opslaan, stap die buurman nader en gee ons sy visitekaartjie. Hy was ’n prokureur en het seker gereken die kampopslanery gaan ons huwelik laat verbrokkel. Vandag slaan ons met ’n glimlag ’n perfekte kamp op.
Maar die kampplek is vol ander goeie bure ook.
