Ninang'atuka 2014

By Dardanus Mfalme

Ni kitabu chanye hazina ya mashairi yaliyotungwa na mtunzi
aliyebobea katika fani ya utunzi wa nyimbo, tenzi na mashairi.
Mtunzi wa kitabu ametunga tungo za kitabu hiki akifuata na kulinda
maadili ya lugha ya Kiswahili kwa malengo ya kuelimisha, kuburudisha na
kufundisha jamii zote. Usomapo kitabu hiki utapata uhondo kamili wa
lugha ya Kiswahili kwani mtunzi wa kitabu ametumia maneno ya Kiswahili
sanifu, Kiswahili cha mitaani na maneno aliyoyatohoa kutoka lugha mbali
mbali ambayo hutumiwa kwa wingi mitaani.
Katika kurasa za mwisho za kitabu hiki, mtunzi ameweka kamusi ya
Kiswahili cha mitaani ili wale wasioelewa Kiswahili cha mitaani waweze
kupata burudani kamili wanaposoma ama wanapoimba mashairi yake.

• Language: English
• Publisher: Xlibris US
• Release date: Dec 26, 2013
• ISBN: 9781483689647

Dardanus Mfalme

Dardanus Mfalme, popularly known as Dardan King, is a Tanzanian-American multi-talented writer, producer, composer, poet, musician, and multi-instrumentalist who is one of the best-selling artists and writers of Swahili music and Swahili poetry books worldwide. For a complete biography, visit www.mfalme.com.

Book preview

NINANG’ATUKA 2014

Dardanus Mfalme

Copyright © 2013 by Dardanus Mfalme.

All rights reserved. No part of this book may be reproduced or transmitted

in any form or by any means, electronic or mechanical, including photocopying, recording, or by any information storage and retrieval system,

without permission in writing from the copyright owner.

Rev. date: 10/30/2013

Xlibris

1-888-795-4274

www.Xlibris.com

140826

Yaliyomo

Utangulizi

1. Nang’atuka

2. Kanyaboya

3. Mishumaa

4. Jalamba

5. Jeuri

6. Msosi

7. Skuna

8. Umaarufu

9. Suti

10. Mafisadi

11. Usinipite

12. Hujaumbika

13. Mgomo

14. Nashukuru

15. Fukara

16. Miujiza

17. Manabii

18. Chuki

19. Jembe

20. Mbio

21. Nyoka

22. Haki

23. Amani

24. Punda

25. Kijiti

26. Suka

27. Wazazi

28. Umbu

29. Maendeleo

30. Nyakati

31. Uchi

32. Mzalendo

33. Bangi

34. Kitimoto

35. Mfalme

Kamusi ya Kiswahili cha mitaani

Utangulizi

Wasalaam,

Ninapenda kuwakaribisha wapenzi wa mashairi, nyimbo na tenzi katika kitabu cha Ninang’atuka 2014. Kitabu hiki kina utajiri wa mashairi niliyoyabuni kutumia mbinu tofauti hivyo kufanya tungo hizi kuwa na ladha tofauti. Kama ilivyo ada yangu, nimechanganya tungo nilizozitunga miaka ya nyuma na tungo nilizozitunga hivi karibuni. Mchanganyiko huo unafanya tungo hizi kuwa zenye hisia tofauti hivyo kumgusa kila msomaji kwa namna ya kipekee.

Sababu hasa ya kukiita kitabu hiki ninang’atuka 2014, ni kutokana na uamuzi nilioufanya wa kung’atuka katika fani ya muziki wa kizazi kipya ujulikanao kama ‘Bongoflava’.

Uhondo kamili utaupata mara usomapo shairi la kwanza la kitabu hiki ambalo limebeba jina la kitabu.

Katika kurasa za mwisho wa kitabu hiki, nimeweka kamusi ndogo ya Kiswahili cha mitaani ili wale wasioelewa Kiswahili cha mitaani nilichokitumia humu kitabuni na katika nyimbo nilizotunga waweze kunielewa barabara.

Karibuni.

1. Nang’atuka

La hasha katu bwatuka, kinywani pumba kutoka,

Mwiko kwangu kuropoka, ulimbukeni epuka,

Kujikweza nimechoka, kama zoba kazibuka,

Nang’atuka Bongoflava, ni mchezo wa kijinga.

Mchezo hauna refa, wala wa kando mwamuzi,

Mchezo kushiba sifa, nahau za kipuuzi,

Wale wasoziba ufa, watajenga kwa machozi,

Nang’atuka Bongoflava, ni mchezo wa kijinga.

Kama ni umaarufu, utapata kwa mafungu,

Ukiuliza sarafu, unazungushwa kizungu,

Utashiba kwa harufu, ukoko wa kuu jungu,

Nang’atuka Bongoflava, ni mchezo wa kijinga.

Wanaita rapu gemu, mchezo pasi kanuni,

Kujinadi na mademu, shobozi za luningani,

Robo na nusu nidhamu, maadili jalalani,

Nang’atuka Bongoflava, ni mchezo wa kijinga.

Walioasisi fani, wameshachomoa timu,

Mifukoni taabani, gemu limewadhulumu,

Kujirudi ukubwani, hazitorudi timamu,

Nang’atuka Bongoflava, ni mchezo wa kijinga.

Si neno la mkosaji, sizitaki mbichi hizi,

Nguli alovikwa taji, mwenye shahada ya kazi,

Kama vile mahujaji, kila mwaka mwaga dozi,

Nang’atuka Bongoflava, ni mchezo wa kijinga.

Haina msisimko, hii fani matangazo,

Ngoma pasi mdundiko, kuchezeka maigizo,

Hasi ni mpangiliko, hata bubu ana tuzo,

Nang’atuka Bongoflava, ni mchezo wa kijinga.

Maisha ya maigizo, hata mlo danadana,

Suruali mlegezo, mfukoni senti huna,

Kuleteana mizozo, promota shavu kanona,

Nang’atuka Bongoflava,