HY MAAK HEELWAT DINGE BEKEND WAT GROOT NAME IN DIE BEDRYF EERDER GEHEIM SOU WOU HOU
HY HET Denzel Washington sy eerste Oscar help wen, Brad Pitt in ’n Western gesit in Legends of the Fall, Leonardo DiCaprio in ’n gangbare Zimbabwiese aksent laat praat in Blood Diamond en Tom Cruise in ’n Japannese kryger verander vir die fliek The Last Samurai.
Anthony Hopkins, Daniel Craig, Claire Danes, Jake Gyllenhaal, Anne Hathaway en talle ander het al met hom saamgewerk. Hy het al te doen gekry met suinige vervaardigers, wispelturige akteurs en Harvey Weinstein op die kruin van dié se golf van manipulasie en mag.
In sy meer as 40 jaar as ’n skrywer, regisseur en vervaardiger het Ed Zwick die beste en slegste van Hollywood gesien. As ’n baanbreker-TV-skrywer en bestuurder het hy die trefferreekse Thirtysomething en My So-Called Life gemaak. Agter die kamera as ’n regisseur en vervaardiger het Ed (71) saam met die grootste sterre in die bedryf die wêreld vol gegaan.
Ed het sy loopbaan as ’n joernalis begin. In ’n oomblik van bepeinsing in die inperking, nadat ’n nuwe weergawe van Thirtysomething op die lange baan geskuif is, het hy besluit dis tyd om sy stories neer te skryf. Die gevolg is Hits, Flops, and Other Illusions: My Fortysomething Years in Hollywood, genotvolle memoires wat op sy vol loopbaan terugkyk.
“Ek’s gewoond daaraan dat mense oor my rolprente stry,” sê Ed in ’n video-oproep uit sy huis in Santa Monica, Kalifornië. Die bebaarde man het ’n uilbril op en sy blokkieshemp is ietwat gewaagd oopgeknoop. Hy lyk soos ’n Hollywood-veteraan.