LEES MEER OOR
● ’n Vrou se kragtoer
● Waar kom die naam vandaan?
● 6 resepte met pesto
Wanneer Kathleen Quillinan met haar klein Fiat 500 deur die verkeer vleg, word sy gereeld begroet deur ’n getoeter. Saam met vriendelik-waaiende hande en uitroepe: “Mal oor jou pesto, gebruik bottels vol!” Sy antwoord dan met ’n koninklike wuif. Maar anders as haar Britse bloubloed-eweknieë s’n is háár glimlag spontaan en breed. “Ons besigheid bestaan al 25 jaar. Mense word met ons pesto groot en koop dit later self ook . . .”
Haar “koets”, ’n Italiaanse maaksel nes pesto, is maklik om te eien. Die swart logo staan uit teen die pêrelwit motor: Pesto Princess Foods, met letters wat dans en bons en ’n ewe stuitige kroontjie eenkant. Dis ’n handelsmerk met humor en glad nie formeel nie, nes Kathleen self.
Die naam is gebore in ’n oomblik van lighartigheid. Op markte landwyd was sy destyds ’n bekende gesig agter haar boktafel. Haar pesto in Purity-flessies, toegedraai met Kerspapier wat met tou vasgemaak is en handgeskrewe etikette, het “tuisnywerheid” gespel. Dis inderdaad in haar kombuis in Observatory,
