Die park is veral bekend vir sy groot olifantbevolking van ongeveer 10 000.
In die suidoostelike hoek van Zimbabwe lê die Gonarezhou- nasionale park van 5 053 km2. Dit is naas Hwange (14 650 km2) die grootste park in die land en vorm boonop deel van een van Afrika se grootste bewareas, die Groter Limpopo-oorgrenspark. Dié enorme 35 000 km2-gebied verbind die Krugerwildtuin en Mosambiek se Limpopo- nasionale park met Gonarezhou sodat wild vrylik tussen die drie lande kan beweeg.
Die park is veral bekend vir sy groot olifantbevolking van ongeveer 10 000 – Gonarezhou is immers ’n Shonawoord wat “plek van die olifante” beteken – maar jy sal ook die res van die Groot Vyf hier aantref. Bring beslis jou verkyker en ’n bondige aftiklysie, want verder is hier 150 soorte soogdiere, 450 voëlspesies, 116 reptielsoorte en ook 50 vissoorte.
Sedert ’n hervestiging in 2021 kan jy selfs weer swartrenosters hier sien nadat hulle 27 jaar afwesig was wees stroping. As jy gelukkig is, sien jy dalk een van die ongewone boksoorte wat hier voorkom – soos die njala, soenie, bastergemsbok of swartwitpens. Die park het baie skaduwee vir die diere (en vir jou) danksy mopaniewoude, worsbome, wildemangobome, jakkalsbessies en natuurlik groot ou kremetarte.
Met ’n CV soos dié is Gonarezhou ’n paradys vir veldryers
