Mabuasehube – losweg vertaal na “Rooi Aarde” uit die plaaslike San-taal – is een van die laaste werklik wilde plekke in Afrika. Wanneer landreisigers “Mabua” hoor, kom nabye ontmoetings met die koning van die oerwoud in hul gedagtes op, met beelde op sosiale media wat dikwels ‘n trop leeus toon wat die kampterrein oorneem. Pure betowering!
Mabuasehube is aan die Botswana-kant van die Kgalagadi-Oorgrenspark en is in die suidweste van Botswana geleë. Dit is Kalahari in sy suiwerste vorm. As jy op soek is na stilte, moenie verder soek nie. Dit is een van daardie plekke waar jy jou siel letterlik ‘n sug van verligting kan hoor slaak.
Die Kalahari Gemsbok Nasionale Park is in Julie 1931 in Suid-Afrika gestig en sewe jaar later, in 1938, is die Botswana Gemsbok Nasionale Park geproklameer deur die destydse Betsjoeanaland. Dieselfde jaar is die boere aan die Botswana-kant, 84 gesinne met meer as 5 000 stuks vee, na die gebied suid van die park hervestig. Die ruïnes van ou wonings en verskeie grafte is steeds naby Rooiputs geleë. Mabuasehube Wildreservaat is in 1971 gestig en is in 1992 by die Kalahari Gemsbok Nasionale Park ingelyf.
In 1948 is ‘n informele mondelinge ooreenkoms tussen die Betsjoeanaland-protektoraat en die Unie van Suid-Afrika aangegaan om ‘n enkele bewaringsgebied in die aangrensende gebiede van die twee lande op te rig. In Junie 1992 het verteenwoordigers van die Suid-Afrikaanse Nasionale Parkeraad (nou SANParke) en die Departement van Natuurlewe en Nasionale Parke (DNNP) van Botswana ‘n gesamentlike bestuurskomitee saamgestel om die