DIS nie wat jy verwag wanneer jy in die huis instap waar ’n eenjarige woon nie.
Hier is niks uit plek nie. Nie ’n primêre kleur in sig nie, nie ’n piep of gekerm te hoor nie, en geen halfgeëte piesang of taai vingermerkies op die vloer nie.
Maar dié is ook nie ’n gewone huis nie, en hier woon nie sommer enigeen nie.
Die televisieaanbieder en sakevrou Clare Wiese-Wentzel het nog altyd geweet waarvan sy hou.
En hier in haar imposante woning in Clifton, een van die mees gesogte woonbuurte in die land, het sy haar lewe as nuwe ma sover moontlik ingerig soos dit haar die beste pas.
Minimalisties, modern en netjies, in skakerings van wit en room, met dinge wat vir haar mooi is. Dis ’n plek waar haar kop kan stil word, en waar sy optimaal kan funksioneer – al is daar deesdae ’n klein woelwater in die huis wat die wêreld vol kruip en net goeters wil uitpak, omkrap en rondkrap.
“Ek kan nie met chaos nie,” erken Clare.
“Toe ek op universiteit was, het ek my kamermaat altyd sover gekry dat ons eers die kamer opruim voor ons begin swot. Dan wil sy iets oorkom, want ons het nog nie eens begin nie en ons skryf die volgende dag eksamen.”
Maar natuurlik weet sy ’n kind en chaos gaan dikwels hand aan hand.
“Ek probeer dit tot sekere kamers
