Jy kry hulle deesdae oral . . . ’n nuwe generasie beroepslui, kreatiewes en avontuurlustiges wat danksy tegnologie hul kantoor saamneem waarheen hul swerflus hulle ook al lei.
Waar “digitale nomades” hul sit kry, daar kan hulle werk – in koffiewinkels, gedeelde werksruimtes, in ’n tydelike blyplek met ’n uitsig op Tafelberg of die Mediterreense See.
Hulle het die wêreld aan hul voete . . . met selfs die burokrasie wat oënskynlik vir hulle die pad gelyk maak: ’n Visum spesiaal vir digitale nomades is ál meer algemeen. Dié dokument stel iemand in staat om wettiglik buite hul landsgrense te werk. Vir hulself of vir ’n maatskappy.
Die bekroonde skrywer Deon Meyer erken hy kan “enige plek skryf as die kalf in die put is: in hotelkamers, op treine, en in vliegtuie . . .”
Hoewel hy “die heel lekkerste” in sy huis op Stellenbosch werk, waar die onderbrekings en afleidings min is, bring Deon en sy vrou, Marianne, ook tyd in Europa deur.
“Ons is so drie maande van die jaar in die buiteland, soms ’n bietjie meer, soms ’n bietjie minder. Poggio Nativo in die Sabynse heuwels van Italië is deesdae die plek waar ons die langste bly,