Die afgelope vier maande was Erica Wessels die dogter van ’n ma wat aan Alzheimers ly, Winston Churchill se vrou, ’n superteef en die eks van ’n onbeholpe huurmoordenaar.
En dis net voor die kamera.
Tuis is die lewe ewe besig . . . “die seisoen van baie doen”, is hoe sy en haar man, Willem Boshoff, dit beskryf. Lyste en lyste elke dag. En met twee klein dogtertjies in die prentjie, raak dit éérs bedrywig. “My kinders is die beste ding wat nog ooit met my gebeur het. Ek is versot op hulle, maar aan die einde van die dag is ek stokflou!”
Vanoggend lyk Erica vars en fleurig in haar saggroen rok waar ons by ’n koffieplek naby hul huis in Nuweland, Kaapstad, gesels, geen teken dat sy slaap ingeboet het nie. “Dis net goeie grimering,” wuif sy met ’n lag die kompliment weg.
Haar vakansie begin amptelik ná dié onderhoud. Dan gaan sy, Willem, Stella (4) en Frida (1) Sederberge toe, waar hulle net in die natuur kan wees. Geen lyste om af te handel