Spyskaart
– VOORAF –
Waatlemoendrankie
Mossels in chorizoroom
– HOOFGEREG –
Gerolde lamsblad
Kies 3 of meer van die volgende:
Langnaweek-aartappelslaai
Groen groente met soetrissiesous
Mosterdring
Anderste wortelslaai
Gebraaide patatslaai
– NAGEREG –
Kondensmelk-crème caramel
Waatlemoendrankie
Vir my is waatlemoen die heel grootste ster in die vrugtemandjie: Jy kan soveel daarmee doen én dit laat in elkeen van ons ’n nostalgiese storie oor die somer ontwaak. As ek eendag my droom bewaarheid om in Mauritius af te tree en dalk ’n klein Suid-Afrikaanse restaurant daar oop te maak, sal dié waatlemoendrankie die ster op die mengeldrankiespyskaart wees.
Genoeg vir 6
Bereidingstyd 10 minute plus verkoeltyd
JY BENODIG
• 3 dik ringe waatlemoen• ¼ koppie (60 ml) bruinsuiker• 150 ml jenewer of vodka (25 ml per drankie)• 300 ml lietsjiesap• sap en gerasperde skil van 3 lemmetjies of suurlemoene• 1 kg gebreekte ys• kruisementblare vir garnering
SÓ MAAK JY
Sny die waatlemoen los van die skil en plaas die vleis saam met die suiker in ’n voedselverwerker. Laat dit teen ’n hoë spoed loop tot ’n fyn mengsel vorm. Gooi die mengsel deur ’n sif om van die pitte en pulp ontslae te raak. Sit die sap in die yskas om koud te word. Meng nou die jenewer of vodka, lietsjiesap en lemmetjie-of suurlemoensap en -skil by die koue waatlemoensap. Vul 6 glase van jou keuse met gebreekte ys. Vul die glase op met die drankiemengsel, garneer dit met vars mentblare en sit dit dadelik voor.