VOOR jou, so ver soos die oog kan sien, lê die dorre woestynlandskap van Saoedi-Arabië – ’n ongenaakbare wêreld.
Hier in die Arabiese woestyn is jy aan die natuur uitgelewer. Op die aarde van klip en sand is jý die teiken, selfs in die koeler wintermaande.
Dis hier waar die Dakar-tydren vanjaar vir die vierde agtereenvolgende jaar gehou is. Waar veldvoertuie, motorfietse en vragmotors sowat 14 dae lank byna 7 000 km van die woestyn deurkruis. Oor klipperige duine en kameelgras, deur modder, oor rotsgebergtes.
Die tydren is bekend as die uitmergelendste op Aarde. Tog is daar ’n ewe veeleisende wedloop wat daarmee meeding: dié van Dakar se hoof-sjef.
Terwyl die renjaers jaag dat die stof staan, moet die Suid-Afrikaner Barend Greyling die kosvoorraad en ’n span sjefs bestuur wat daagliks nagenoeg 11 000 maaltye moet lewer.
Tussen die agt tentedorpe in