Jongboer van die Jaar
Om ’n boerdery wat meer as ’n eeu oud is, oor te neem en te bestuur, is ’n ysingwekkende taak. Die versoeking is daar om op jou louere te rus, want hoekom krap waar dit nie jeuk nie?
Dit is egter in dié denkwyse waar die dood in die pot lê en loer, sê Jimie Malan (31), nuutgekroonde Jongboer van die Jaar van Toyota en Agri SA.
As kannetjie het Jimie en sy broer, Louis, gehelp om plantsakkies vol te maak om geld te verdien.
“My pa, Jacques, het nie sakgeld gegee nie en ons eerder klein-klein by die besigheid betrek. Die meeste plante was in plastieksakkies en ons het 2 sent per sakkie gekry. Só het ek van vroeg af geleer van werketiek; van werk vir jou inkomste.”
Sy gunstelingaktiwiteit was om steggies in die kweekhuis te help maak en dan te sien hoe die plantjies ontwikkel. “Dit was ’n passie om met plante te werk en in die tuin te wees.”