NEE! Dis nie die tyd vir kyf en kerm nie. Dis Kersfees. Dis die tyd vir vrede en liefde. Vir jou man en stout kinders, vir die bure met die blaffende honde, vir die bakker, die slagter. Vir jou skoonmense en vir Eskom.
“Is dit regtig te veel gevra, Louis?” wil Veronika amper smekend weet. “Om vir ’n verandering hierdie Kersfees as ’n gesin alleen vakansie te hou? Sonder dat jou familie van die noorde en die suide van die aardbol af saamflenter en laer trek in die karavaanpark by Uilenkraal?”
En veral sonder om Skoonma soos ’n sak vol sonde saam te sleep? Met haar verweerde tasse en plastieksakke en bokse vol verkeerde klere en kos wat niemand wil hê nie.
Maar Veronika sê dit darem nie hardop nie. Dis wat gebeur as ’n mens verlief raak op ’n Mamma’s boy en dan nog met hom gaan staan en trou ook. Jy bly opgeskeep met
